Ondare naturala

Ataun, Agauntza ibaiaren eta Domoa sortu zuten indarren artean modelatutako orografia malkartsuko herria da, bere 58’7 km2–ko hedaduraren %75 Aralar Parke Naturalaren babesean gelditzen delarik 1994tik.

Lehen sektoretik bizi izan den herria izaki, lur-erabilerari loturiko paisaia harkaitzek eragindako muga naturalekin tartekatzen da egungo landaredia landaredi potentzialarekin konbinatuz.

Lizarrusti Parketxea ere, Ataunen kokatzen da, Aralar Parke Naturalera sarrera nagusienetakoa da, interpretazio zentroa, aterpetxe eta taberna zein jatetxe funtzioa betez leku estrategikoan kokaturik baitago, eta bertatik ematen zaie hasiera Lareo, Alleko, Berrenoa,... eta beste hainbat tokitara ibilaldiei, PR eta GR ibilbide asko elkartuz.

Ataungo domoa

Herrian Aitzarte bezala ezagutzen den eta Jentilbaratza, Aizkoate, Aizkorrandi, Arastortz, Agautz, Leizadi, Asundi, Loibideko Mailoak eta Ikarandieta mendiek osatzen duten mailarte bitxi honi deritzaio domo. Oso egitura geologiko berezia da, eta egun duen eraztun itxurak atentzioa deitzen du, orogenia piriniarraren ondoriozko indarrek bertako indar perpendikular batzuekin elkarreraginez, lurrazala gorantz altxatu zen kupula itxurako mendi bat sortuz.

Formazio hau gogortasun desberdineko materialez osatua zegoen, kareharri eta harri buztintsuez hain zuzen ere. Altxaketa gertatzean emandako presio gogorrek kareharrizko goi-geruza pitzatu zuten, eta honela hasi zen goiko azal gogor honen disolbatze-prozesua. Horrela bada, egungo egoerara heldu da, higaduraren ondorioz lehen kupula zena eraztun bihurtuz. Zer esanik ez, Arrateta eta Artzatezar aldeetako ebakidurak ere Aitzarte eta Kobatxo erreken higaduraz sortu direla.

Domoa bere osotasunean ikusteko Ataun eta Idiazabal arteko mugan dagoen Arantzazumendiko bizkarra leku egokia da. Hala ere, domoko edozein tontorretatik zein barnealdetik haren zati bat ikus dezakegu. Agautz, Sarastarri edo Leizadiko tontorretara igoz gero, domoaren iparraldeko muturra ikus dezakegu adibidez.


Lizarrusti Parketxea. Aralar Parke naturaleko Parketxeko Informazio Bulegoa

Zerbitzuak
Aterpetxea, taberna, jatetxea, Aralarko Interpretazio Zentroa.
Ordutegia
Asteartetik igandera, 9:00etatik 23:00etara. Sarrera: Doakoa.
Harremanetarako
Tel.: 943582069 / 699672575
E-posta: erlo.koop@gmail.com

Lizarrusti parketxea

Lizarrusti Parketxeak eta inguruneak zerbitzu eskaintza zabala du. Badu aterpetxe funtzioa betetzen duen atala, talde zein banakoentzat irekia. Eta badu ere taberna zein jatetxe zerbitzua, bertaratzen den edonorentzako atsedenaldia egiteko aukera eskaintzen duena. Inguruan mendira doan edonorentzat aparkalekua, iturri, jolastoki eta atseden-gune modura mahai eta eserlekuak ditu.

Bertan kokatzen da Aralarko Interpretazio Zentroa ere, Aralar Parke Naturalean barneratzen diren baliabide natural eta kulturalen izatea eta kudeaketa egokia azaltzen direlarik bertan. Aralarko baliabide naturalen ezagutza naturarekiko errespetua landuz, habitat edo ekosistema desberdinak bereizten ikastea eta beraien egokitasun maila aztertzen jakitea, eta oro har ingurunea ezagutu eta bere egoera ebaluatzeko gaitasuna jorratzea da interpretazio zentruaren helburu nagusia.